ლანჩხუთის მუნიციპალიტეტში, სოფელ ჭანჭათში მცხოვრები მოსახლეობა დახმარებას ითხოვს. სოციალურ ქსელში არაერთი ადგილობრივის თხოვნა გავრცელდა და მოხალისეებისგან და ხელისუფლებისგან დახმარებას ამ დრომდე ელოდებიან.
“გურია თუდეის” დაუკავშირდნენ სოფელ ჭანჭათიდან და უთხრეს, რომ ბარამიძეების ოჯახი ვერ ახერხებს მიცვალებულის დაკრძალვას. “ურთულესი მდგომარეობაა, 2 მეტრი თოვლია. გზა არ არის, გადაადგილება შეუძლებელია. მიცვალებული ხომ უნდა დაკრძალონ? ტელეფონითაც ხშირად ვერ გვირეკავენ, უფრთხილდებიან, არ დაუჯდეთ. იქნებ მიგვიწვდინონ ხმა, რომ დაეხმარონ” – გვითხრა 26 თებერვალს ოჯახის ახლობელმა.
მეორე დღეს, სოციალურ ქსელში ანუკა ოდიშელიძემ დაწერა: „სოფელ ჭანჭათში არის მიცვალებული, რომელსაც უგზოობის გამო ვერ კრძალავენ და თან მიცვალებულის დედა ვერ მიდის თავისი შვილის დასატირებლად. 2 მეტრი თოვლია და ისევ თოვს. გთხოვთ, იქნებ რამე გამოსვალი არსებობდეს, რო გზა გაიწმინდოს ან გაიკვალოს მაინც, რომ ელემენტარული მოძრაობა შეიძლებოდეს. ტექნიკა ვითომ რაც გაგზვნეს. ორჯერ გაფუჭდა!!!“
მას „გურია ნიუსი“ ესაუბრა: „ჩემი ოჯახია იმ სოფელში ჩარჩენილი, სადაც არის მიცვალებული. ლანჩხუთის რაიონი სოფელი ჭანჭათში იმყოფება ყველასათვის საყვარელი ქალბატონის, თამარ ნინიძის ცხედარი. გახლავთ პედაგოგი, მათემატიკის მასწავლებელი, რომელიც ყველას ძალიან უყვარს. ავადობდა ქალბატონი თამარი და დიდთოვლობამდე გადაყვანილი იყო ბათუმში, კლინიკაში, სადაც სამწუხაროდ 24 თებერვალს გარდაიცვალა. სოფელში უკვე 2 მეტრი თოვლი იყო, მის სახლამდე მისასვლელი გზა გაუკვალავი და ადგილობრივმა ბიჭებმა ფეხით იარეს ამ გაუკვალავ გზაზე და ძლივს მოიყვანეს გარდაცვლილი სახლში. მაშინაც ვითხოვდით გზის გაწმენდას, მაგრამ ვერ გაიწმინდა გზა. ერთი კილომეტრი გაუკვალავ გზაზე იარეს ბიჭებმა და ჩვენი საყვარელი მასწავლებელი მიასვენეს სახლში“ _ უთხრა ოდიშელიძემ გამოცემას.
აღნიშნულ პრობლემაზე მთელი დღის განმავლობაში წერდნენ ჯგუფებში „მოხალისეები გურიისთვის“ და „აკეთის განვითარებისთვის“.
დღის მეორე ნახევარში სამოქალაქო აქტივისტმა, ილია ღლონტმა დაწერა: „14 წლის გურამი მამასთან ერთად ფეხით მიდის გარდაცვლილ დედასთან… კავშირზე ვართ გურამის მამასთან. გზის გასაწმენდათ საჭირო იყო მძიმე ტექნიკა, რომლის მობილიზება დღეს ვერ მოხერხდა. ვმუშაობთ კერძო კომპანიებთან და გამგებობასთან, რომ ხვალ მაინც მძიმე ტექნიკით მოხერხდეს გზის გაწმენდა და გარდაცვლილის გამოსვენება… შეუძლებელია ეს ყველაფერი…“
მალე მან დაწერა: „სოფელ ჭანჭათში ქალბატონი გარდაიცვალა. მის 14 წლის შვილს უნდოდა დედის მონახულება, მაგრამ 3 დღეა გზა არ გაიწმინდა და გურამი ვერ ახერხებდა დედასთან მისვლას, შემდეგ ის მამამ ფეხით წაიყვანა. ასე მივიდა გურამი გარდაცვლილ დედასთან“.
საღამოს ილია ღლონტმა აღნიშნა, რომ „გამგეობისგან მიიღო პირობა, რომ ხვალ აიყვანენ ტრაქტორს, ასევე თქვეს, რომ ინფორმაცია არ ქონდათ აღნიშნულ სიტუაციაზე, თორემ აუცილებლად მოახდენდნენ რეაგირებას“.
