გაზეთ „ლანჩხუთის მოამბეს“ ყოფილი რედაქტორი ამირან მორჩილაძე, რომელიც ბოლო წლებში სოფლის მეურნეობის კუთხით აქტიურად საქმიანობს, სოციალურ ქსელში წერს, რომ გურიისთვის გამოყოფილი 2 მილიონი ლარი სტიქიის სალიკვიდაციოდ საკმარისი არ არის.
„როგორც მითხრეს, მთავრობამ დიდთოვლობით „დანგრეული” გურიისთვის 2 მილიონ ლარზე მეტი გამოყო. მიმაჩნია, რომ ეს სასაცილო თანხაა ზარალთან შედარებით. ბევრი სახლი დაინგრა, ასევე დამხმარე ნაგებობები, ერთი ღობე არაა ფეხზე. ხეხილი, მოცვის, ციტრუსის პლანტაციები განადგურდა, ზარალი ახლაც კარგად ჩანს, მაგრამ ხელშესახები მაინც შემოდგომაზე იქნება, გლეხს რომ ნალიაში შესაყარი არაფერი ექნება, მერე იყვირებს, თუმცა ნალიებიც სადაა ფეხზე? ხოდა, შენ, ჩემო კარგო მთავრობავ, რას ფიქრობ? არჩევნები გაქვს შემოდგომაზე, ხომ არ გავიწყდებათ. თქვენ კაი ხალხო, გილაურმა მაგდენი თანხა ხუთკაციან ამერიკულ კომპანიას გადაურიცხა – კაი დეილაპარაკე ჩემზეო“ _ წერს ამირან მორჩილაძე „ფეისბუქის“ პირად გვერდზე.
ცნობისთვის, თებერვლის ბოლო კვირაში, გურიას დიდთოვლობამ დიდი ზიანი მიაყენა. დღეების მანძილზე არაერთი სოფელი გარესამყაროსგან მოწყვეტილი იყო, მოსახლეობას არ მიეწოდებოდა ელექტრონერგია და ბუნებრივი აირი. სამივე მუნიციპალიტეტში შეიქმნა როგორც სამთავრობო, ასევე მოხალისეები შტაბები, საიდანაც სტიქიის ზონაში ჩარჩენილ მოსახლეობას საკვებით და წამლებით ამარაგებდნენ, ასევე გამოჰყავდათ უსაფრთხო ადგილებზე. ვითარების სირთულის გამო, მთავრობამ საქმეში თავდაცვის სამინისტროს ძალებიც ჩართო.
