ლანჩხუთის მართლმადიდებლური სკოლის დირექტორის მოადგილე ლევან გიორგაძე სოციალურ ქსელში წერილს აქვეყნებს, რომელიც ტრაგიკულად დაღუპულ მოსწავლეს, ნიკოლოზ გვარჯალაძეს ეძღვნება:
„არ შეგეშინდეს, შვილო! შენ სახლში დაბრუნდი… მამის სახლში დაიდე ბინა…
იქ, შენს სახლში, ყველა გულში ჩაგიკრავს, მოგეფერება…
ღმერთის დედა გიმღერებს იავნანას. მის საბურველში გაგახვევს და თბილად ეყოლები…
ყველა წმინდანი, ვისაც იცნობდი, იქ გელოდება…
“ანგელოზთა მისთადა უბრძანებიეს შენთვის დაცვად ყოველთა შინა გზათა შენთა” – შენთვის დაუწერია ფსალმუნთ მგალობელს…
ამ წუთისოფლიდან, რომელმაც დიდხანს ვერ შეგინარჩუნა, საგზლად წაიყოლე ყველა ლოცვა, ცრემლი და დანთებული სანთელი, რომელიც ულევად იღვრებოდა შენთვის…
დედა და მამა არ მიატოვო, სიზმრებში გამოეცხადე…
ძამიკო ზეციდან დალოცე ხანგძლივი და მადლიანი სიცოცხლისთვის…
წუთისოფელი მარადისობისკენ მიმავალ გზაზე სამეცადინოდ, საწვრთნელად შექმნა გამჩენმა. შენ, ჩემო შვილო, ცოტა გეყო, სულ ცოტა – შენ ბეჯითი ბიჭი აღმოჩნდი, ბევრი წვრთნა აღარ დაგჭირდა.
მე ბევრის მოცემა ვერ შევძელი, ბევრის სწავლა ვეღარ მოვასწარი შენთვის. სამაგიეროთ, შენ გახდი ჩემთვის საუკეთესო მასწავლებელი – სიყვარული, თავმდაბლობა, ერთგულება და კიდევ, ძალიან ბევრი რამ დამასწავლე. მასწავლე, როგორ უნდა გავიარო გზა საუფლომდე…
ნურც მე დამივიწყებ, ჩემთანაც მოდი, მესაუბრე, მომიყევი მაქაურობაზე…
ამიტომ, არ გემშვიდობები, ჩემო მაგარო ბიჭო! ჩემო ვაჟკაცო!
შეხვედრამდე, ჩემო ნიკოლოზ!“ _ წერს ლევან გიორგაძე.
ლანჩხუთის მუნიციპალიტეტის სოფელ შუხუთში მომხდარმა ავტოავარიამ 15 წლის ნიკოლოზ გვარჯალაძის სიცოცხლე შეიწირა.
