“ძალიან სასიხარულო ინფორმაცია მაქვს დიდთოვლობისას დაზარალებული ოჯახებისთვის!!! „ქართული ოცნების” გადაწყვეტილებით, სტიქიასთან “ეფექტურად მებრძოლ” სახელმწიფო უწყებებისა და მუნიციპალიტეტის თანამშრომლებს ფულადი ჯილდოს სახით ხელფასზე დანამატებს მისცემენ. საუბარია 3 მილიონ 200 ათას ლარზე. გილოცავთ! დაცინვაც ასეთი უნდა…” _ ასე ეხმაურება ლანჩხუთელი სამოქალაქო აქტივისტი და ჟურნალისტი გიორგი მორჩილაძე მიერ გავრცელებულ ინფორმაციას, რომლის მიხედვითაც მთავრობამ ზოგიერთი სახელმწიფო უწყებისა და მუნიციპალიტეტის თანამშრომლები „დიდთოვლობის დროს სტიქიასთან ბრძოლაში აქტიურად ჩართულობისთვის“ ფულადი ჯილდოს სახით ხელფასზე დანამატები გამოყო.
[ამის შესახებ გაზეთ „ბათუმელების“ სტატია: „მთავრობამ საჯარო მოხელეებისთვის ფულადი ჯილდო, 3 მლნ ლარი გამოყო დიდთოვლობასთან ბრძოლისთვის“ წაიკითხეთ ბმულზე: https://shorturl.at/W7Gv5]
გამოცემის ცნობით, თანხა უწყებებზე და მუნიციპალიტეტებზე შემდეგნაირად გადანაწილდება: შინაგან საქმეთა სამინისტრო – 892 445 ლარი; ჯანდაცვის სამინისტრო – 697 226; თავდაცვის სამინისტრო – 585 770; რეგიონული განვითარებისა და ინფრასტრუქტურის სამინისტრო – 113 563; გარემოს დაცვისა და სოფლის მეურნეობის სამინისტრო – 79 409; ოზურგეთის – 253 372; ლანჩხუთი – 96 623; ვანი – 95 000; ზესტაფონი – 77 037; ჩოხატაურის – 76 288; ბაღდათი – 53 550 ლარი; ჭიათურა – 45 573; თერჯოლა – 40 158; ტყიბული – 37 000; ხონი – 18 668.
განკარგულებიდან არ ჩანს, ამ სამინისტროებსა და მუნიციპალიტეტებში რომელი დასაქმებულები მიიღებენ დანამატს დიდთოვლობის გამო.
„2025 წლის თებერვალში დასავლეთ საქართველოში დიდთოვლობის დროს სტიქიასთან ბრძოლაში აქტიურად ჩართულ საქართველოს ზოგიერთ სამინისტროში, მათ დაქვემდებარებაში მყოფ დაწესებულებებსა და მუნიციპალიტეტების შესაბამის ორგანოებში დასაქმებულებზე ფულადი ჯილდოს/დანამატის გაცემის მიზნით, საქართველოს ფინანსთა სამინისტრომ მთავრობის სარეზერვო ფონდიდან გამოყოს 3 161 682 ლარი“ – აღნიშნულია „ოცნების“ მთავრობის მიერ გამოცემულ განკარგულებაში.
ზოგადად, სტიქიის შედეგების სალიკვიდაციოდ, მთავრობის კიდევ ერთი, 2025 წლის 28 მარტის განკარგულებით, სხვადასხვა მუნიციპალიტეტისთვის ჯამში 77,6 მილიონი ლარი უნდა გამოიყოს. ეს თანხა კი სხვადასხვა პროექტებისთვისაა გათვლილი.
დიდთოვლობამ წელს პრობლემები განსაკუთრებით გურიაში შექმნა. დიდთოვლობით გამოწვეული პრობლემების დასაძლევად მოქალაქეებს მოხალისეები ეხმარებოდნენ.
გურული დასაქმებულები 3,16 მილიონიდან 426 283 ლარს მიიღებენ, მთავარ ქალაქ ოზურგეთში 2,6-ჯერ მეტი გაიცემა, ვიდრე ლანჩხუთში და 3,3-ჯერ მეტი _ ვიდრე ჩოხატაურში.
