ლანჩხუთის სპორტული ცენტრის მოჭიდავე ნიკა ცეცხლაძე 2025 წლის საქართველოს ვიცე-ჩემიონია 17-წლამდელთა შორის, 51 კგ. წონით კატეგორიაში.
მისი მწვრთნელის, დავით მჟავიას თქმით, ნიკამ ფინალამდე ყველა შეხვედრა აშკარა უპირატესობით მოიგო. თან ისე, რომ ქულაც არ დაუკარგავს. „ფინალური შეხვედრის პირველი პერიოდიც 3:0 მოიგო, მაგრამ მეორეში ვერ შეძლო უპირატესობის შენარჩუნება და მინიმალური სხვაობით დამარცხდა. ამ შეჯიბრისთვის ნიკა სათანადოდ ვერ მოემზადა, იანვარში მიღებული ფეხის ტრამვის გამო, რითაც თითქმის ერთი თვე გაუცდა, მაგრამ არა უშავს, მას დიდი წარმატებები წინ აქვს“ _ ამბობს მწვრთნელი.
ნიკა ცეცხლაძე და მისი მწვრთნელი _ დავით მჟავია (ორივე წითლებში)
ნიკას უმცროს ძმას, ამიკო ცეცხლაძესაც შეეძლო საპრიზო ადგილის აღება _ მან აშკარა უპირატესობით მოიგო 2 შეხვედრა, მაგრამ შემდეგ, ჯერ ფინალში გასულ მოჭიდავესთან დათმო მოსაგები შეხვედრა, შემდეგ კი, უშუალოდ ბრინჯაოს მედლისათვის დაძაბულ ბრძოლაში დამარცხდა მინიმალური სხვაობით.
ცნობისათვის, ძმები წინა წლის საქართველოს ჩემპიონები არიან თავიანთ ასაკში (U-17 და U-15). ამიკო ევროპის ჩემპიონატის ბრინჯაოს მედლის მფლობელიცაა. იგი ჯერ მხოლოდ 16 წლისაა და გაისადაც უწევს 17 წლამდელთა შორის მონაწილეობა.
60 კგ. წონით კატეგორიაში გურული ფინალი გაიმართა _ რეზი გუჯაბიძემ ჩემპიონის ტიტული მოიპოვა, ლაზარე გოგოტიშვილი ვიცე-ჩემპიონი გახდა
აღსანიშნავია, რომ ჩემპიონატში პირველი გუნდური ადგილი ოზურგეთმა დაიკავა _ ამ ქალაქის ორი წარმომადგენელი (რეზი გუჯაბიძე, ერეკლე თავბერიძე) ჩემპიონი გახდა, ორმა (გიორგი გორდელაძე, ლაზარე გოგოტიშვილი) მხოლოდ ფინალი დათმო, ხოლო 4 ფალავანი (ალექსანდრე კალანდაძე, ლუკა კორძაძე, ცოტნე კოჩალიძე, საბა ტაკიძე) მესამე საპრიზო ადგილზე გავიდა. თუ ლანჩხუთელ ვიცე-ჩემპიონსაც დავამატებთ, გურულებმა U17-ზე 9 მედალი მოიპოვეს.
